MAYNILA (UPDATE)—Apat ang kumpirmadong patay habang 10 ang sugatan matapos bumangga sa isang puno at tumaob ang isang jeep sa bayan ng Jalajala, Rizal nitong Sabado.

Ayon kay Lary Malaybalay, opisyal ng Municipal Disaster Risk Reduction and Management Office, kabilang sa mga nasawi ang isang mag-asawa at dalawang estudyante.

Batay sa kanilang inisyal na imbestigasyon ay binabagtas ng jeep na galing Tanay ang kalsada sa Barangay Bagombong nang biglang mawalan ito ng kontrol at bumangga sa puno.

Sa lakas ng impact ay bumaligtad ang jeep, dahilan para maipit ang driver at ilang pasahero habang ang 4 na pasahero ay agad binawian ng buhay.

Ayon kay Jalajala Police Chief Amadeo Estrella, naisugod na sa ospital ang mga pasahero. 

"Ayon po dito sa kotse na nasa likuran niya, matulin po 'yung driver ng jeep. Nag-overtake siya pero pagliko niya po nabulaga siya ng truck, so kumabig siya papunta kaagad sa lane niya then nagdire-diretso po sa puno at du'n po siya bumangga. Du'n po tumaob ang jeep," ani Estrella.

Pero ayon sa MDRRMO, wala naman umanong nakasalubong na sasakyan ang jeep at posibleng self-accident ito. 

Patuloy ang imbestigasyon ng mga awtoridad ukol sa insidente.

I-refresh ang pahinang ito para sa updates.

–May ulat ni Ron Lopez, ABS-CBN News

Bisitahin ang Patrol.PH para sa iba pang mga balita.

bin picking