DAVAO CITY – Tadtad ng sugat ang braso at kamay ng 30-taong gulang na si Alexander Penalosa matapos pagtatagain ng mga hindi kilalang naka-motorsiklo pasado alas-2 madaling araw ng Linggo malapit sa Garcia Farm, Barangay Tugbok, Tugbok District.

Ihahatid sana ang biktima ng mga kasamahan nito pauwi sa kanilang bahay nang nangyari ang insidente.

Ayon sa kaniyang kasama na si Sebastian Gutierrez, sinasabing naingayan ang grupo ng lalaki nang dumaan ang kanilang sinasakyang closed-cab na tricycle at dahil doon ay sinundan sila.

Nagawa pang tumakbo ang mga kasamahan ni Penalosa pero inabutan siya ng mga lalaki sapagkat hindi na niya nakayanang tumakbo dahil sa sobrang kalasingan.

Base sa imbestigasyon, posibleng nagkaalitan na ang magkabilang panig sa Matina Aplaya hanggang sa sinundan sila ng mga salarin at ginawa ang pananaga sa kanila.

Gamit ang kuha sa CCTV, pinaghahanap na ngayon ng mga awtoridad ang responsable sa pananaga sa biktima.

Kasalukuyang ginagamot sa ospital ang biktima.

bin picking