Watch more in iWantv or TFC.tv

Hindi man kadugo, higit pa sa isang anak kung alagaan ng mga nagsisilbing house parent ang mga bata sa Cottolengo Filipino sa Montalban, Rizal.

Nasa pangangalaga ng naturang shelter ang 39 bata na pawang inabandona ng kanilang mga magulang, at may mga karamdaman o kapansanan gaya ng Down syndrome at autism.

Isa sa mga nag-aaruga sa mga bata ang 54 taong gulang na si Edna Eleuterio.

Mula alas-10 ng gabi hanggang alas-6 ng umaga ang pasok ni Eleuterio.

Kabilang umano sa kaniyang mga ginagawa ay ang pagpalit ng diaper ng mga bata, at pagpapakain at pagpapaligo sa mga ito.

Sa mga pagkakataong tulog naman daw ang mga bata ay naglilinis naman siya.

Dahil 17 taon na siyang house parent, nasubaybayan na rin niya ang paglaki ng karamihan sa mga bata, gaya ng paborito niyang si "Michael."

"Mayroon siyang ugali… makulit, malambing, yayakapin ka, [sasabihin] 'Nanay, tabi tayo,'" kuwento ni Eleuterio.

Dahil sa kaniyang karanasan sa pag-aalaga, may hiling si Eleuterio sa ibang mga magulang.

"Sana kung sila ay may mga ganoong anak, mahalin nila kasi bigay ng Panginoon 'yan eh," aniya.

Kasalukuyang tumatanggap ng volunteers o on-the-job trainees ang Cottolengo Filipino, lalo iyong may mga kasanayan bilang caregiver, physical o occupational therapist, at nursing o psychology students.

— Ulat ni Zen Hernandez, ABS-CBN News

Bisitahin ang Patrol.PH para sa iba pang mga balita.

robot vision