Noong dekada 90, muntik nang makapasok ni Johnny Abarrientos sa NBA. File/Arvin Lim, ABS-CBN Sports

Alam ninyo bang noong dekada 1990, muntik nang magkaroon ng isang Pinoy na lumaro sa NBA?

At ito ay walang iba kundi si dating PBA MVP Johnny Abarrientos.

Napansin siya umano ng ilang NBA scouts tulad ni Joe Bettancourt, isang consultant para sa Charlotte Hornets na dumalaw sa bansa para hainan si Abarrientos ng offer.

“Actually, twice n'ya ako in-offeran. Una, training camp lang sa Charlotte, pero hindi namin masyadong pinansin 'yun. If you think about it, parang malayo sa katotohanan, kasi di namin alam kung seryoso sila sa offer,” ani Abarrientos sa isang artikulong lumabas sa Spin.ph.

Naghahanap noon ang Hornets ng ipapalit kay Muggsy Bogues na madalas ma-injure.

Ayon kay Tim Cone, dating coach ni Abarrientos sa Alaska, seryoso si Bettancourt sa kanilang offer at gusto nilang makita kung anong kayang iambag ng Pinoy point guard sa Charlotte.

“They were looking for a replacement for Muggsy Bogues and their offense was built around a small point guard. So he was very interested in bringing Johnny in, at least for a 10-day contract, or bring him over and let (Charlotte) take a look at him,” aniya.

Payag din naman daw si Alaska owner Fred Uytengsu na pakawalan si Abarrientos, dahil tulad ng marami nangangarap din ang team owner na magkaroon ng Pinoy player sa NBA.

“Kung natuloy yun, first Asian ako sa NBA. Mauunahan ko pa sana sina Wang Zhizhi,” kwento ni Abarrientos, na ipinagdiwang ang ika-48 na kaarawan nitong Martes.

Pero di na tumawag ulit ni Bettancourt dahil ilang araw makalipas ng kanilang pag-uusap at itinrade ng Charlotte si Bogues.

Naniniwala si Abarrientos na kaya pa rin ng Pinoy makapasok sa NBA.

“Wala lang tayong height to compete. Pero yung tiwala na we can get there, yun ang importante,” aniya.

(For more sports coverage, visit the ABS-CBN Sports website.)

Bisitahin ang Patrol.PH para sa iba pang mga balita.

ai vision